தண்ணீரில் செதுக்கிய சிலைகள்

     நாம் கல்லில் சிலைவடித்தால் அமெரிக்கர் தண்ணீரில் சிலை வடிக்கின்றனர். தண்ணீரில் சிலை வடிக்க இயலுமா? இயலும் எனச் சொல்லி சாதித்துக் காட்டியுள்ளனர். ஒரு சிலையா இரு சிலையா நூறு சிலைகளை வடித்துக் கண்காட்சியாகக் காட்டிவிட்டனர்.

     Gaylord Texon Resort என்பது அந்த இடத்தின் பெயர். வடக்கு டெக்சாஸ் மாநிலம் டெல்லாஸில் உள்ளது. ஆளுக்கு இருபத்து ஐந்து டாலர் கட்டணம். நுழைவாயிலில் நின்ற ஒருவர் ஒரு சிறப்பு அங்கியைத் தந்து அணியுமாறு சொன்னார். அது Parka எனப்படும் அதிகக் குளிரைத் தாங்கும் சிறப்பு உடை. ஷூ அணியாமல் யாரும் உள்ளே செல்ல அனுமதியில்லை. நல்ல வேளையாக நாங்கள் ஆண், பெண், குழந்தை உட்பட அனைவரும் ஷூ அணிந்து சென்றோம். கதவைத் திறந்து நடந்தால் வழி தவறி வடதுருவத்திற்கு வந்தது போல குளிர் நிலவியது. அந்தப் பாதை சரிவாகச் சென்றது; அது ஒரு பாதாள அறையை நோக்கிச் சென்றது. நடக்க முடியாமல் போகுமோ என அஞ்சும் அளவிற்கு உடல் குளிரால் விறைத்தது.

     அங்கே இருந்தவரிடம் வெப்பநிலை என்னவென்று கேட்டேன். ‘எட்டு டிகிரி ஃபாரன்ஹீட்’ என்றார். நான் அடிப்படையில் ஓர் இயற்பியல் பட்டதாரி என்பதால், ஒரு மனக்கணக்குப் போட்டுப் பார்த்தேன்; அது மைனஸ் பதின்மூன்று டிகிரி சென்டிகிரேட்!

    சுழியன் டிகிரி சென்டிகிரேட் என்றாலே தண்ணீர் பனிக்கட்டியாக உறைந்துவிடும். மைனஸ் பதின்மூன்று டிகிரி என்றால் கேட்கவா வேண்டும்? இப்போதுதான் புரிந்தது இவர்களால் தண்ணீரில் எவ்வாறு சிலை செதுக்க முடிகிறது என்று.

     பனிக்கட்டிகளில் கண்ணைக் கவரும் வகையில் வண்ணச் சிலைகளை வடித்து வைத்திருந்தனர். ஆனால் அங்கு நிலவிய கடுங்குளிரில் நின்று நிதானமாகப் பார்த்து மகிழ இயலவில்லை. காமிராவை எடுத்து என்னால் கிளிக் செய்ய முடியவில்லை. கையுறை அணியாமல் சென்றதால் விரல்களை இயக்க இயலவில்லை. எனது பயணக் கட்டுரைகளுக்காகக் காத்திருக்கும் வலைப்பூ வாசகர்களை ஏமாற்றக்கூடாது என்னும் எண்ணத்தில் ஒருவாறு சமாளித்துக் கொண்டு படம் எடுத்தேன்; பாதிக்குப் பாதியே தேறின.

  

                             A 30 sec. video
இந்தக் கொடுமையான குளிரிலும் அங்கே ஒரு கடை இருந்தது. அங்கும் சிலர் தேநீர் அருந்தியபடி நின்றனர்!

    என்னால் இருபது நிமிடங்கள் மட்டுமே தாக்குப் பிடிக்க முடிந்தது. விரைவாக -இல்லை இல்லை- விறைப்பாக வெளியேறினேன், அவர்கள் கொடுத்த அங்கியைத் கழற்றித் தந்துவிட்டுப் போதுமடா சாமி என நினைத்துக்கொண்டு கார் நிறுத்தகத்தை நோக்கி நடந்தேன். ஆனாலும் ஏதோ ஒன்றைச் சாதித்த உணர்வும் உள்ளத்தில் தோன்றி மறைந்தது.

முனைவர் அ.கோவிந்தராஜூ, அமெரிக்காவிலிருந்து.

என் உணர்வில் கலந்த சைக்கிள்

   எங்கள் சொந்த ஊரான கூவத்தூரில் மிஞ்சிப் போனால் பத்து வீடுகளில் சைக்கிள் இருக்கும். ஒருவர் சொந்தமாக சைக்கிள் வைத்திருக்கிறார் என்றால் அவர் வசதியானவராகக் கருதப்பட்ட காலம்(1960) அது. சைக்கிள் வாங்கும் அளவுக்கு வசதியான நிதிநிலை இருந்தும் எங்கள் அப்பா ஏனோ சைக்கிள் வாங்கவில்லை. அவருக்கு சைக்கிள் ஓட்டத் தெரியாது என்பது ஒரு காரணமாக இருந்திருக்கலாம்.

சைவ உணவுக்குச் சரியான இடம்

   அமெரிக்காவில் நாங்கள் வசிக்கும் டெல்லாஸ் நகரில் ஏராளமான அசைவ உணவகங்கள் உள்ளன. இந்த உணவகங்களில் சைவ உணவு வகைகளும் கிடைக்கும். நாம் தக்காளிச் சோற்றை உண்ணும்போது பக்கத்தில் உள்ளவர் தந்தூரிக் கோழியை உண்பார். நிறைய சகிப்புத்தன்மை உள்ள சைவ உண்ணிகள் இங்கே சாப்பிடலாம். இத்தகைய உணவகங்களில் என்னால் உண்ண முடியும். ஆனால் என் துணைவியாருக்கு ஒத்து வராது. சுத்த சைவம்.

நடுநிலைப்பள்ளி மாணவர்கள் நடித்த நல்ல நாடகம்

    எங்கள் உறவினர் வீட்டுக் குழந்தை படிக்கும் பள்ளியில்(Bear Creek School) நடந்த கலைவிழா ஒன்றைக் காண்பதற்காக நான், என் துணைவியார், மகள், மாப்பிள்ளை ஆகிய அனைவரும் சென்றோம்.

இணைய வழியே வரும் இழப்புகள்

    தாம் உழைத்துச் சேர்த்த பணத்தை இணையவழி மோசடியால் இழப்போர் ஒரு பக்கம். இன்னொரு பக்கம் தாம் ஆசை ஆசையாய்ப் பெற்று வளர்த்த இளம் பிள்ளைகளை இழக்கும் சோகம் இணையவழியில் அரங்கேறுவதைப் பொறுத்துக்கொள்ள இயலவில்லை.

அன்றில் பறவைகள் அமெரிக்கா சென்றன

    இரண்டு மகள்கள் இரண்டு நாடுகளில் வாழ்வதால் எனக்கும் என் மனைவிக்கும் இரண்டாண்டுகளுக்கு ஒருமுறை வானில் பறப்பது வாடிக்கை ஆகிவிட்டது. என்னை Frequent flier என்று சொல்லி என் மாப்பிள்ளை கிண்டல் செய்வதும் உண்டு. இதுவரை நான் வானில் பறந்த அனுபவங்களை என் வலைப்பூவில் அவ்வப்போது மிக விரிவாக எழுதியுள்ளேன். அவற்றையும் அவற்றிற்கு வாசகர்கள் தந்த பின்னூட்டங்களையும் தொகுத்தால் ஒரு தனி நூலாகவே வெளியிடலாம்.

எங்கெங்கு காணினும் பேய்கள்

     சென்ற வாரம் கனடா முழுவதும் ஒரே கலக்கலாக இருந்தது!  கடுங்குளிர் நிலவிய போதிலும் பரவசமாகக் கொண்டாடினார்கள். உலகில் ஆவிகளைக் கொண்டாடும் நாடுகள் பலவாக உள்ளன. அவற்றுள் கனடாவும்  ஒன்று.  அக்டோபர் 31ஆம் தேதிதான் அவர்களுக்கு ஆலவின்  எனப்படும் பேய்கள் தினம். Halloween Day என ஆங்கிலத்தில் குறிப்பிடுகிறார்கள்.