மணிகண்டனுக்கு ஒரு ஓ போடலாமா?

  பன்னாட்டு நிறுவனத்தில் மென்பொருள் பொறியாளர்; பை நிறைய சம்பளம்; பெங்களூரில் சொந்த வீடு; வசதிக்கும் குறைவில்லை; விடுகிற மூச்சை நிறுத்தினாலும் நிறுத்துவார் எழுதுவதை நிறுத்த மாட்டார்.

புத்தகங்கள் எழுதி புகழை ஈட்டியவர். புதிதாக புகழ் சேர்க்க வேண்டிய அவசியம் இல்லாதவர். பிறகு எதற்கு இந்த இமாலயப் பணியை தன் தலையில் இழுத்துப் போட்டுக்கொண்டு அலைகின்றார்? அதுதான் அவரது தனிச் சிறப்பு.

    நண்பர்கள் நம்பி ஒப்படைத்த பத்து இலட்சம் ரூபாயை எடுத்துக் கொண்டு செங்கல்பட்டு வந்து 5000 கிலோ அரிசி, 200 கிலோ பருப்பு, 200 கிலோ பொடிவகைகள், 100 கிலோ எண்ணெய், இன்ன பிற பொருள்கள் என வாங்கி குவித்துவிட்டார். அவற்றை ஆயிரம் குடும்பங்களுக்கு வினியோகம் செய்ய வசதியாக ஆயிரம் கோணிப் பைகளில் அடைக்கும் பணிகள் தொடங்கிவிட்டன. குடும்பத்தை விட்டு வந்து செங்கல்பட்டில் ஒரு வாரம் தங்கி நிசப்த உற்வுகளின் உதவியுடன் மகத்தான பணிசெய்து வருகிறார்.

   நாளையோ மறுநாளோ  வெள்ளச் சேதப் பகுதிகளுக்குச் சென்று நிவாரணப் பொருள்களை வினியோகம் செய்ய திட்டமிட்டுள்ளார். எனது கவலை என்னவென்றால், எல்லாம் சுமூகமாக முடிய வேண்டுமே என்பதுதான். வட்டங்களும் சதுரங்களும் அவருடைய பணிகளுக்கு ஊறு விளைவிக்காமல் இருக்க வேண்டும். மீறி அவர்கள் ஏடாகூடமாக ஏதேனும் செய்ய முற்பட்டால் தன் எழுத்தால் அறம் பாடியே கொன்றுவிடுவார்; அப்படி ஒரு  நக்கீர துணிச்சலுடையவர் இந்த மணிகண்டன்.

   எல்லாம் சரி. யார் இந்த மண்கண்டன் என்று கேட்கிறீர்களா?

    என்னுடைய தலை மாணாக்கர்களில் முதல் மாணாக்கர். கோபிசெட்டிபாளையம் வைரவிழா மேல்நிலைப்பள்ளியில் என்னிடம் படித்த மாணவர். நிசப்தம் என்னும் அறக்கட்டளையை உருவாக்கி அதன் மூலம் பல நற்பணிகளைப் பாங்குறச் செய்பவர். நிசப்தம் டாட் காம் என்னும் இணயதளத்தில் விழிப்புணர்வை உருவாக்கும் கட்டுரைகளை நாள்தோறும் எழுதி வருபவர். பார்க்க:     www nisaptham.com

  என்ன மணிகண்டனுக்கு ஒரு ஓ போடலாமா?