பார் வியக்கும் பதிவர் திருவிழா

   என்னதான் நடக்கும் நடக்கட்டுமே என்ற மன நிலையில் சென்ற நான் நடந்த நிகழ்வுகளைக் கண்டு வியந்து போனேன். முகம் தெரியாத பதிவர்களை ஒன்று சேர்ப்பது என்பது பகீரத முயற்சிதான்.

அம் முயற்சியில் இமாலய வெற்றி அடைந்திருக்கிறார்கள் விழாக் குழுவினர்.

   நிகழ்ச்சி நிரல் அருமை. இடையிடையே தென்றலென தவழ்ந்து வந்த சுபாஷிணியின் பாடல்கள் அருமையிலும் அருமை. பக்க வாத்தியம் உண்மையில் பக்கா வாத்தியமே.

  தங்கம் மூர்த்தி அவர்களும் முத்து நிலவன் அவர்களும்  நகைச் சுவை உணர்வு இழையோட  இணைப்புரை வழங்கியது படு பிரமாதம்.

  இளந் துணைவேந்தரின் இனிமையான உரையை என்னென்பேன்! பேசிய அனைவரும் பொருத்தமாகப் பேசினார்கள். முனைவர் அருள்முருகனின் பங்களிப்பு அசத்தலானது.

  பதிவர் கையேடு என்பது மணிகளாம் பதிவர்களை மாலையாக இணைக்கும் பொன்னிழை என விளங்குகிறது. இனி நம் பதிவுகளுக்குக் கூடுதலான நோக்கர்கள் கிடைப்பார்கள்.

    இத்தகைய சந்திப்புகளின் வெற்றிக்கு அடிப்படை உணவும் உபசரிப்புமே ஆகும். மனதுக்குப் பிடித்த வகையில் இவை பாராட்டும்படியாக அமைந்ததன.

  மரக்கன்று நட்டு விழாவைத் தொடங்கியது கலாம் அவர்ககளுக்குச் செலுத்தப்பட்ட உண்மையான அஞ்சலியாகும். பதிவர் அறிமுகம், பரிசளிப்பு, நூல் வெளியீடு, பதிவர் நூல் கண்காட்சி, ஓவியக் கவிதை பதாகைகள், ஒலி ஒளி அமைப்பு எல்லாமே சிறப்பாக அமைந்தன.

 அகவை முதிர்ந்த பதிவர்களை வணங்கி மகிழ்ந்தேன்; இளைய பதிவர்களை வாழ்த்தி மகிழ்ந்தேன். முப்பத்தைந்து ஆண்டுகளுக்கு முன் என்னிடம் பயின்ற தலை மாணாக்கர்களில் ஒருவரான ஓட்டுநர் பரமேஸ்வரனைச் சந்தித்து அளவளாவியதில் நான் அடைந்த மகிழ்ச்சிக்கு எல்லையே இல்லை.

எனது  முன்னாள் மாணவர் பரமேஸ்வரனும் நானும்

   பிற்பகல் நிகழ்வில் முத்தாய்ப்பாக விளங்கிய  எழுத்தாளர் எஸ்.இராமகிருஷ்ணன் அவர்களுடைய பேருரை திருக்குறள் போல அமைந்தது. அவர் பேச்சிலிருந்து ஒரு சொல்லைக்கூட நீக்கவும் முடியாது; சேர்க்கவும் முடியாது.

 பாவலர் முத்து நிலவன் அவர்களும், திண்டுக்கல் பொன்.தனபாலன் அவர்களும் இணைந்து, மற்றவர்களை இணைத்துச் செயல்பட்டதால்தான் விழா வெற்றிகரமாக அமைந்தது.

  என் பார்வையில் குறை ஒன்றும் தென்படவில்லை. நான் வழங்கும் மதிப்பெண் 100/100.

  ஆனால் சிலர் குறையாகக் குறிப்பிட்டுப் பேசியதை நான் இங்கு குறிப்பிட்டாக வேண்டும். அவர்கள் சொன்னதாவது:

1.             போட்டிக்கு வந்த படைப்புகளை அவ்வப்போது வெளியிட்டது சரியில்லை. முடிவுகள் அறிவிக்கப்பட்டப் பிறகு வெளியிட்டிருக்க வேண்டும்.

2.       விழாக் குழுவினர் போட்டியில் பங்கேற்றதும், நடுவர்களாக செயல்பட்டதும் சரியன்று.

3.             நன்கொடையாளர்களுக்கு உடனுக்குடன் பற்றுச்சீட்டும் நன்றிக் கடிதமும் அஞ்சல் மூலமாக அனுப்பப்பட்டிருக்க வேண்டும்.

   பாரதி சொன்னதைப் போல எவரோ பேதையர் சிலர் உரைத்தார் என இவற்றை ஒதுக்கிவிட்டுப் பார்த்தால்  இந்த விழா அமுதம் நிரம்பிய நிறை குடமாகத் திகழ்ந்தது எனலாம்.

    விழாவின் வெற்றிக்குப் பாடுபட்ட அனைவரும் வாழ்க வளமுடன் என வாழ்த்துவதைத் தவிர அவர்களுக்கு நான் என்ன கைம்மாறு செய்ய முடியும்?