புத்துணர்வு தரும் பூங்கா

     ஒரு நூறு ஏக்கர் பரப்பில், அதுவும் நகரின் நடுவில், ஓர் அழகான தாவரவியல் பூங்கா அமைந்துள்ளது என்னும் செய்தியை நம்பாமல்தான் அங்கு போனேன். நம்பினேன் நேரில் பார்த்தபின்.

   கண்டு களிக்கும் பூங்கா என எண்ணிச் சென்றேன். சென்றபின்தான் தெரிந்து கொண்டேன். அது கண்டு களிக்கும் பூங்கா மட்டுமன்று கண்டு கற்கும் பூங்காவும் கூட. ஆம், எல்லா வயதினரும் குறிப்பாக மாணவ மாணவியர் கற்றுக் கொள்ளும் வகையில் ஆங்காங்கே கட்செவி துணைக்கருவிகளை அமைத்துள்ளனர். ஒரு மாணவர் அவை அனைத்தையும் பொறுமையாகப் பார்த்துப் படித்து, கேட்டு மனத்தில் பதிந்தால், அவர் இயற்கையை நேசிக்கும் நற்குடிமகனாக உருவாவது உறுதி. இத்தகைய ஏற்பாடுகள் நம் நாட்டில் உள்ள தாவரவியல் பூங்காக்களில் இல்லையே எனும் ஏக்கப் பெருமூச்சும் உடன் எழுந்தது.

    வாட்டும் கடுங்குளிர் குறைந்து வசந்த காலம் தொடங்கி விட்டதால், பூங்காவில் மக்கள் கூட்டம் நிரம்பி வழிந்தது. கூட்டம் கூட்டமாக அமர்ந்து உண்டு உரையாடுவோர் ஒரு பக்கம். நன்னீர் குட்டைகளில் வாழும் ஆமை, வண்ண மீன்களைக் கண்டு களிப்போர் இன்னொரு பக்கம். புல் தரைகளில் பந்து விளையாடி மகிழ்வோர் பிறிதொரு பக்கம். மிகுதியான கூட்டமாக இருந்தாலும் அது தகுதியான கூட்டமாக இருந்தது. உண்டு முடித்தோர் மிச்சம் மீதிகளை உரிய இடத்தில் மட்டுமே போட்டார்கள். நெகிழிப் பொருள்கள் பயன்பாட்டில் எந்தத் தடையும் இல்லை. ஆனால் அவை கண்ட இடங்களில் போடப்படுவதில்லை. அப்படியொரு சமூக உணர்வு பொதுமக்களிடையே காணப்பட்டது.

   

 கண்ணைக் கவரும் பூக்கள் கணக்கின்றிப் பூத்துக் கிடக்கின்றன. ஆனால் யாரும் பறிப்பதில்லை; தொடுவதும் இல்லை. அப்படியொரு பொதுக் கட்டுப்பாடு பொதுமக்களிடையே காணப்படுகிறது. இங்கே மகளிர் தம் கொண்டையில் பூச்சூடும் வழக்கமில்லை என்பதும் ஒரு காரணமாக இருக்குமோ?

   பூங்காவின் ஒரு பகுதியில் வீட்டுத் தோட்டம் அமைப்பது பற்றிய இலவச பயிற்சிக் கூடமும் அமைந்துள்ளது. கோஸ், காலிஃபிளவர் முதலியன அங்கு செழித்து வளர்ந்து நிற்கின்றன.

   அரிய வகைத் தாவரங்களை தட்ப வெப்ப கட்டுப்பாட்டுக் கூடாரங்களில் வைத்துப் பாதுகாக்கும் தனிப்பிரிவு உள்ளது. பயிற்சிப் பட்டறைகளை நடத்த வசதியாக உள்ளரங்கு ஒன்றும் உள்ளது.

   ஒரு செய்தி. ஆனால் நீங்கள் நம்பமாட்டீர்கள். இந்தப் பூங்காவில் திருமணம், பிறந்தநாள் விழா போன்றவை நடந்த வண்ணம் உள்ளன. சுமார் நூறு பேர்கள் கூடும் அளவுக்கு ஒளி, ஒலி, இருக்கை போன்ற எல்லா வசதிகளும் செய்யப்பட்டுள்ளன. அமெரிக்கர் பூங்காவில் திருமணம் செய்து கொள்வதைப் பெருமையாகக் கருதுகின்றனர்.

  

  வண்ணப் பூச்செடி முதல் வானை முட்டும் மரங்கள் வரை இங்கே நாம் காண முடியும். அனைத்துக்கும் விவரங்கள் எழுதப்பட்டுள்ளன. இங்கே பறந்து திரியும் பறவைகள் பல வகையின. அவை எழுப்பும் ஒலிகளைப் பதிவு செய்து ஒரு பொத்தானை அழுத்தினால் கேட்கும் வகையில் ஏற்பாடு செய்துள்ளனர்.

  

  இந்தப் பூங்காவிற்கு ஒரு தனிச் சிறப்பு உண்டு. இங்கு நடப்பெற்றுள்ள மரங்கள், போடப்பட்டுள்ள இருக்கைகள் எல்லாம் பொதுமக்களின் பங்களிப்பு ஆகும். இப் பூங்காவைப் பராமரிப்பதற்கு ஒரு தன்னார்வலர் குழுவும் செயல்படுகின்றது!

   

Green snake

  1933 ஆம் ஆண்டு திறக்கப்பட்ட இப் பூங்கா ஆட்சி மாற்றங்களால் இதன் மாட்சி பெருகியது என்பதே வரலாறு. நம் ஊரில் ஓர் ஆட்சியில் உருவானது அடுத்த ஆட்சியில் என்ன ஆகும் என்பது நமக்குத் தெரியுமே. இதற்கு சென்னை வள்ளுவர் கோட்டமும், பூம்புகாரும் சான்றாக உள்ளன.

    பூங்காவில் நடந்து திரிந்த களைப்பு அறவே இல்லை. அதற்கு இரண்டு காரணங்கள்: ஒன்று பூங்காவின் அமைப்பு அப்படி. இன்னொன்று என் துணைவியாரும், என் நண்பரின் துணைவியாரும் தயாரித்துக் கொண்டுவந்த விதவிதமான, சுவையான உணவு மற்றும் தின்பண்டங்கள்.

முனைவர் அ.கோவிந்தராஜூ,

அமெரிக்காவிலிருந்து.