தமிழன் என்று சொல்லடா தலை குனிந்து நில்லடா

   நிலையாமை குறித்துப் பாடிய திருவள்ளுவரின் திருக்குறள் ஈராயிரம் ஆண்டுகளுக்குப் பின்னரும் நிலைத்து நிற்கிறது. ஆனால் அவர் நினைவாக  எழுப்பப்பட்ட சென்னை வள்ளுவர் கோட்டம் இன்னும் பத்தாண்டுகள் நிலைத்திருக்குமா என்பது சந்தேகமே.

   நான் சென்னை செல்லும் போதெல்லாம் வள்ளுவர் கோட்டத்திற்குச் செல்வதுண்டு. ஆனால் கடந்த ஐந்தாண்டுகளில் அது கைகூடாமல் போயிற்று. இம்முறை நேரம் ஒதுக்கிப் பார்க்கச் சென்றேன். பார்த்துவிட்டுக் கண்ணீர் மல்க இப்பதிவை இடுகிறேன்.

   ஒரு காலத்தில் சென்னைக்குக் கண்ணாக விளங்கிய வள்ளுவர் கோட்டம் இன்று சென்னையின் புண்ணாக விளங்குகிறது. ஏனோ நுழைவாயிலை வேறுபக்கத்திற்கு மாற்றியுள்ளனர். நான் சென்றபோது ஏதோ ஒரு தனியார் நிறுவனத்தின் விற்பனைப் பொருள்காட்சி அங்கே பரவிக் கிடந்தது.

   ஆறாயிரம் பேர் அமரத்தக்க, 220 அடி நீளமும் 100 அடி அகலமும் கொண்ட தூண்கள் எதுவும் இல்லாத அந்த மாபெரும்  அரங்கம் இப்போது பொலிவிழந்து காணப்படுகிறது. மேல் மாடியில் அமைந்துள்ள குறள் மணிமாடம் சிதைந்தும் சீரழிந்தும், உடைந்தும் உருமாறியும் தோன்றுகிறது.

   திருவாரூர் தேர்வடிவில் அமைந்துள்ள,  பளிங்குக் கல்லில் ஆன சிற்பத் தேரும், அதன் மேலே திருவள்ளுவர் சிலை  அமைந்த கருவறையும் பூட்டிக் கிடக்கின்றன. கருவறைக்குச் செல்லும் வேயா மாடப்பகுதி வெறுமனே பாழாய்க் கிடக்கிறது.

  31.1.1976இல் கட்டி முடிக்கப் பெற்ற வள்ளுவர் கோட்டம் 15.4.1976இல் அன்றைய மேதகு குடியரசுத் தலைவர் பக்ருதீன் அலி அகமது தொடங்கிவைத்தார். ஏழு ஏக்கர் பரப்பளவில் தொண்ணூற்று ஒன்பது இலட்சம் ரூபாய் செலவில் கட்டப்பட்டது இன்றைக்கு ஐந்நூறு கோடி ரூபாய் ஒதுக்கினாலும் கட்ட முடியாது. மக்கள் வரிப் பணத்தில் கட்டப்பெற்ற இம்மாபெரும் கலைக்கூடம் இன்று களையிழந்து வழிப்போக்கர்களின் தங்குமிடமாகவும், தூங்குமடமாகவும் கிடக்கின்றது.

       இதைத் தட்டிக் கேட்க யாருமே இல்லையா? தமிழ் அறிஞர்களெல்லாம் கட்சிச் சாயம் பூசிக்கொண்டு கண்மூடிக் கிடக்கின்றார்களா? என்னக் கொடுமையடா இது. சோ சொல்வது போல யாருக்கும் வெட்கமில்லை.

  வள்ளுவர் கோட்டம் குறித்து கூகிள் இணையதளத்தில் பார்த்தால் நாக்கைப் பிடுங்கிக் கொள்ளும் வகையில் ரெவ்யூ போட்டுள்ளார்கள். ஒரு நாளில் பல நூறு பேர் வருகை தந்த இச் சுற்றுலா மையத்திற்கு இப்போது பத்து பேர்கூட வருவதில்லையாம்.

   இவை எவற்றையும் காணச் சகிக்காமல் வள்ளுவர் கோட்டத்தின் பின்புறத்தில்(ஒரு காலத்தில் முன்புறமாக இருந்தது) கையிலுள்ள ஒரு நூலைப் படித்தபடி சிலையாக அமர்ந்துள்ளார் பேரறிஞர் அண்ணா அவர்கள்.

   அழகான கலைச் சின்னங்கள் ஆட்சி மாற்றத்தால் அலங்கோலமாகிப் போவது எந்த விதத்தில் நியாயம் ஆகும்?

   எனவே, வள்ளுவர் கோட்டத்தை மீட்டெடுக்க எவ்வகையிலேனும் முயற்சி செய்ய வேண்டியது தமிழர்களின் கடமையாகும். சட்ட மன்றத்தில் குரல் கொடுக்கலாம்; போராட்டம் நடத்தலாம்; உண்ணாவிரதம் இருக்கலாம். தேவை எனின் உயர் நீதி மன்றத்தையும் அணுகலாம்.