மரம் வளர்த்த மாமனிதர்

    வறுமையின் கோரப்பிடியில் சிக்கித் தற்கொலை எண்ணத்துடன் திரிந்த ஒருவரை, “யாமிருக்கப் பயமேன்?” என்று சொன்னதுடன் நில்லாமல் அவரை கோடீஸ்வரனாகவும் ஆக்கிக் காட்டியவை மரங்கள் என்றால் நீங்கள் நம்புவீர்களா?

மரம் தங்கசாமி  (ஒளிப்படம்: இந்து தமிழ்)

   கொஞ்சம் நேரம் ஒதுக்கி, புதுக்கோட்டை மாவட்டம் கீரமங்கலம் அருகில் உள்ள சேந்தங்குடி கிராமத்திற்குச் செல்லுங்கள். ‘மரம் தங்கசாமி வீடு எது?” என்று ஒரு பால்குடிக்கும் குழந்தையிடம் கேட்டாலும் சற்றும் தயங்காமல் வழிசொல்லும்.

   விவசாயப் படிப்பில் பட்டயமும் பயிற்சியும் முடித்த தங்கசாமிக்கு அரசு வேலை தர தயாராய் இருந்தும், தந்தையின் வேண்டுகோளை ஏற்றுத் தன் பரம்பரைத் தொழிலான விவசாயத்தில் ஈடுபட்டார். ஆயிரத்துத் தொள்ளாயிரத்து அறுபதுகள் வயல்வெளிகளில் இராசயன உரங்கள் பயன்பாட்டுக்கு வந்த காலம். தம்மிடம் இருந்த பத்து ஏக்கர் வானம் பார்த்த பூமியில் கிடைத்தத வெள்ளாமை வருமானம் உரம் பூச்சிமருந்துக் கடனை அடைப்பதற்குக்கூட போதுமானதாய் இல்லை. ஒரு கட்டத்தில் முப்பது ஆயிரம் ரூபாய் கடனாளியாக ஆகிவிட்டார்.

    ஒருநாள் முன்னிரவில் ஒரு தாளை எடுத்துத் தற்கொலை சாசனம் எழுதத் தொடங்கினார். அப்போது திருச்சி வானொலியில் வேளாண் நிகழ்ச்சி ஒலிபரப்பாகிக் கொண்டிருந்த நேரம். ”மரம் வளர்ப்பீர் மனக்கவலையைப் போக்குவீர்” என்று காற்றில் வந்த அந்தச் சொற்கள் அவரை நிமிர்ந்து உட்கார வைத்தன. தொடர்ந்து நிகழ்ச்சியைக் கேட்டார்.

      தற்கொலை எண்ணத்தைக் கைவிட்டுக் களத்தில் இறங்கினார்.

  மறுநாள் வயலுக்குச் சென்றார். வேட்டியை மடித்துக் கட்டி கடப்பாரையை எடுத்தார். ஒரே மாதத்தில் பத்து ஏக்கரிலும் தேக்குச் செடிகளை நட்டு தலைமீது தண்ணீர் சுமந்து ஊற்றினார். ஊரார் நகைத்தனர்; பைத்தியம் என்றனர். அவர் கருமமே கண்ணாக இருந்தார். ஐந்தாண்டுகளில் நன்கு வளர்ந்த மரங்களை மட்டும் வெட்டி விற்றார். கடனும் தீர்ந்தது. காசும் சேர்ந்தது. காலப்போக்கில் அக்கம்பக்கதுக் காடுகழனிகளையும் வாங்கி சந்தன மரங்களை நட்டார். அப்புறம் என்ன? வீடு, வாகனம் என வசதியானார். வளர்ந்த ஒரு செஞ்சந்தன மரத்தின் விலை மூன்று இலட்சம் ரூபாய். இன்றைய தேதியில் ஆயிரம் மரங்கள் வளர்ந்து நிற்கின்றன.

   மரம் வளர்க்கும் மகத்துவத்தை மற்றவருக்கும் மனமுவந்து சொல்லிக் கொடுத்தார்.

  திருமணத் தாம்பூலப்பையில் முதன்முதல் மரக்கன்று போட்டுக் கொடுத்த மாமனிதர் இவர்தான். ஐம்பது ஆண்டுகளுக்குமுன் தன் மகன் திருமணத்தின் போது பத்தாயிரம் மரக்கன்றுகளை வழங்கினார்.

     தொடர்ந்து  இயற்கை வேளாண்மையை மீட்டெடுத்த நம்மாழ்வாருடன் இணைந்து பணியாற்றினார் பல்கலைக்கழகங்கள் அவர் வளர்த்த குறுங்காட்டை நோக்கிச் சென்றன. வெளிநாட்டிலிருந்து வந்த விவசாய அதிகாரிகள் தங்கசாமியிடம் தஞ்சம் புகுந்து பாடம் படித்தனர்.

  ஒவ்வொரு விவசாயியும் தம் விவசாய நிலத்தில் மூன்றில் ஒருபகுதியில் குறுங்காடு வளர்க்க வேண்டும் என்பது தங்கசாமி மரக்கோட்பாடாகும்.

  மரம் தங்கசாமிக்கான  விருதுகளும் விழாக்களும் நாளேடுகளில் அடிக்கடி வரும் தலைப்புச் செய்திகளாக ஆன நிலையில், அண்மையில் முதுமையினால் நிகழ்ந்த அவரது மரணமும் தலைப்புச் செய்திகளாக வந்து மர ஆர்வலர்களிடையே மாபெரும் அதிர்ச்சியை ஏற்படுத்தியது.

   இரங்கல் தெரிவிக்க வந்தவர்கள் பத்தாயிரத்திற்கும் மேற்பட்டோர். அனைவருக்கும் மரக்கன்றுகள் வழங்கப்பட்டன என்பது புதிய செய்தியாகும்.

   நானும் அவருக்கு அஞ்சலி செலுத்தும் வகையில் ஒரு தேக்கு மரக்கன்றை நட்டு அவரது நினைவாக அதற்கு, தங்கத்தேக்கு என்று பெயர் சூட்டி கண்ணும் கருத்துமாக வளர்த்து வருகிறேன்.