வண்ணத்துப் பூச்சிகள் வாழ்க

 

 உறவினர் வீட்டுக் குழந்தையின் காது குத்து விழாவிற்குச்சென்றிருந்த நாங்கள் அருகிலிருந்த வண்ணத்துப் பூச்சிப் பூங்காவிற்கும் சென்றோம். ஒரு வேலையாகச் செல்லும்போது இன்னொரு வேலையையும் சேர்த்து முடித்து விடுவது என்பதில் நான் குறியாக இருப்பேன். இந்த நுணுக்கத்தை எனக்குச் சொல்லித் தந்தவர்  திருவள்ளுவர்.

வினையான் வினையாக்கிக் கோடல் நனைகவுள்

யானையால் யானையாத் தற்று 

என்பது எனக்கு மிகவும் பிடித்தக் குறளாகும்.

   ஸ்ரீரங்கத்திலிருந்து காவிரிக் கரையோரமாகவே பயணித்தால், எட்டாவது கிலோமீட்டரில் மேல் அணைக்கட்டு காப்புக்காடு என்னும் சிற்றூர் கண்ணில் தென்படும். அங்குதான் வண்ணத்துப் பூச்சிப் பூங்கா அமைந்துள்ளது. ஸ்ரீரங்கத்திலிருந்து காரில் சென்றோம். நான் மெதுவாகவே காரைச் செலுத்தினேன். சாலையின் இருபுறமும் கிடுகிடு பள்ளம்! சாகசப் பயணம்தான் போங்கள். அரை மணி நேரம் ஆயிற்று; திரும்பும்போது பதினைந்து நிமிடமே ஆனது.

   

விரைந்து அழிந்து வரும் பூச்சியினங்களில் வண்ணத்துப் பூச்சியும் அடங்கும். அதனுடைய கண்களில் 600 லென்சுகள் உள்ளன! 165000 வகை வண்ணத்துப் பூச்சிகள் இருந்ததாக அறிவியலார் கணக்கிட்டுள்ளனர்! இப்போது எஞ்சியிருப்பவை சில வகை வண்ணத்துப் பூச்சிகளே. அவற்றைக் காக்க வேண்டியது காலத்தின் கட்டாயமாகும். இல்லாவிட்டால் நமக்குப் பூவா கிடைக்காது; புரியவில்லையா? மகரந்தச் சேர்க்கை எதுவும் நடக்காது; அதனால் உண்ண உணவு கிடைக்காது. எனவே இப்படி ஒரு பூங்காவை அமைக்க வேண்டும் என யோசனை கூறியவர்களைப் பாராட்டுவோம்.

    13.11.2015 அன்று தமிழக முதல்வர் மாண்புமிகு ஜெ.ஜெயலலிதா அவர்களால் காணொளிக் காட்சி மூலம் திறந்து வைக்கப்பட்டது. பல்வகைச் செடிகளும் பச்சைப் பசேலென்று காட்சி அளிக்கின்றன. குடி நீர், கழிப்பறை வசதிகள் நன்றாக உள்ளன. பரந்த வாகன நிறுத்துமிடம் வசதியாக இருக்கின்றது. ஆனால் மிதிவண்டிக்குக் கூட கட்டணம் செலுத்தியாக வேண்டும்.

    பூங்காவில் ஆங்காங்கே சிறு  குடில்களை அமைத்துள்ளார்கள். வுருவோர் போவோர்க்கு முதுகைக் காட்டியபடி இளசுகள் கிசுகிசுத்துக் கொண்டிருக்கின்றன. பிள்ளையார் பிடிக்க குரங்காய் வந்த கதைதான்.

    நானும் என் மனைவியும் அரை மணி நேரமாக வண்ணத்துப் பூச்சிகளைத் தேடி அலைந்தோம்; தேன் பூச்சிகள் கூட தென்படவில்லை. ஆங்காங்கே வண்ணத்துப் பூச்சிகளின் ஓவியங்களையும், சிலைகளையும் வைத்திருந்தார்கள்! கடைசியில் சில மஞ்சள் நிற வண்ணத்துப் பூச்சிகள் பறந்து சென்றதைப் பார்த்தோம்.

   ஆயிரக்கணக்கான வண்ணத்துப் பூச்சிகள் பறக்க, நடுவிலே நாங்கள் நடக்கலாம் என்னும் கற்பனையோடு சென்ற எங்களுக்கு ஏமாற்றம்தான் மிஞ்சியது. ஆனாலும் நம்பிக்கை உள்ளது. ஓராண்டுதானே ஆகிறது. இன்னும் சில ஆண்டுகளில் வண்ணத்துப் பூச்சிகள் வந்து சிறகடிக்கும் என எதிர்பார்க்கலாம். என்ன நம்மவர்க்குத் தொடக்கத்தில் உள்ள ஆர்வம் தொடர்ந்து இருப்பதில்லை. இப் பூங்கா தொடர்ந்து நல்ல முறையில் பராமரிக்கப்பட வேண்டும் என்பது எங்களைப் போன்ற சுற்றுச் சூழல் ஆர்வலர்களின் ஆசை.

     இப் பூங்காவிற்கு வாகன  வசதி உள்ளோர் மட்டுமே செல்ல முடியும். பேருந்து வசதி எதுவும் இல்லை. பேருந்துகள் செல்லமுடியாத குறுகிய சாலையாக உள்ளது. அரசு நினைத்தால் ஆவன செய்யலாம்.

    சாலையின் எந்த இடத்திலும் பூங்கா குறித்த வழிகாட்டி விவரம் இல்லை. யாரையாவது நிறுத்திக் கேட்கலாம் என்றால் ஆள் அரவமே இல்லை. சூழல் ஆர்வலர்கள் முன்வந்து இப் பணியைச் செய்தால் புண்ணியமாய்ப் போகும்.

     எது எப்படியோ, திருச்சிக்குச் செல்வோர், ஸ்ரீரங்கம் செல்வோர் ஒரு எட்டு வண்ணத்துப் பூச்சிப் பூங்காவிற்கும் சென்றுவரலாம்.